పెళ్ళి - లొల్లి

నెల రోజుల క్రితం మాట ... సంక్రాంతి పండక్కి ఊరెళ్దామని మా మేనేజర్‍ని వారం రోజులు సెలవడిగాను ... ప్రాజెక్ట్ డెడ్‍లైన్‍లు , వాడికున్న గ్యాస్ ట్రబుల్ , ఆఫీస్ టాయిలెట్‍లో టిష్యూ పేపర్‍ల కొరత మున్నగు అత్యంత కీలకాంశాలు సాకుగా చూపిస్తూ , నా లీవ్ అప్లికేషన్‍ని బుట్టదాఖలు చేసాడు ...

ఒళ్ళు మండిన నేను , లంచ్ బ్రేక్‍లో మిగతా కొలీగ్స్ ముందర , నేను రీసెంట్‍గా చూసిన మళయాళం డబ్బింగ్ మూవీలో సురేష్ గోబి విలన్‍ని తిట్టిన అమ్మనాబూతులన్ని మా మేనేజర్‍పై ప్రయోగించాను ... నా గట్స్ కి ఇంప్రెస్స్ అయిన మా కొలీగ్ సుబ్బారెడ్డి , పండక్కి వాళ్ళింటికి భోజనానికి రమ్మని పిలిచాడు ..

ఒక బ్రహ్మచారిగా నాకు లబించిన ఈ అరుదైన గౌరవాన్ని , అర్జెంట్‍గా ఎవరితోనైనా పంచుకోకపోతే అజీర్తి చేస్తుందని , నా చిన్ననాటి స్నేహితుడు రాజేష్ గాడికి ఫోన్ చేసి విషయమంతా చెప్పాను ..

మాటల మధ్యలో , " పెళ్ళెప్పుడ్రా ??? " అనడిగాడు వాడు ...

" అఫ్ఫుడే పెళ్ళెంట్రా నాకు ? అయినా నీకు తెలుసు కదా , బాల్యావివాహాలు చట్టరిత్యా నేరమని .. " అనన్నాను నవ్వుతూ సరదాగా ...

" నేనడిగేది నీ పెళ్ళి గురించి రా .. కరెక్ట్ టైమ్‍కి పెళ్ళయ్యుంటే నీకు పుట్టిన పిల్లల పెళ్ళి గురించి కాదు రా ... " అనన్నాడు సకిలిస్తూ ..

ఆ అవమానాన్ని భరించలేక పొయ్యాను ... వెంటనే కాల్ కట్ చేసి , వాడి నంబర్‍ని పెర్మనెంట్‍గా బ్లాక్ చేసాను ...

పండగ రోజు , సుబ్బారెడ్డింటికి బయల్దేరుతూ , ఒట్టి చేతుల్తో వెళ్తే బాగోదని , ఏమి తీసుకెళ్ళాలో పాలు పోక , పెరుగు తోడేసుకుంటున్న మా అమ్మమ్మకి ఫోన్ చేశాను ..

" అమ్మమ్మ ... నా స్నేహితుడింటికి భోజనానికి వెళ్తున్నాను .. ఖాళీ చేతుల్తో వెళ్ళొందంటారు కదా , ఏమి తీసుకువెళ్ళమంటావే ? " అనడిగాను ..

" పండగ పూట ఇంటికి రాకుండా , పూటకూళ్ళోడిలా పరాయి ఇళ్ళ మీద పడి తినే ఖర్మేమి పట్టిందిరా నీకు ? ఊరుగాని ఊరిలో ఉద్యోగం వద్దంటే విని చావవు .. నా మాట విని మన ఊరి స్కూల్లో పంతులుగా చేరి , మన దూరపు చుట్టం ప్రభాకర్ గారి అమ్మాయిని పెళ్ళి చేసుకొని హాయిగా ఇంటి పట్టున ఉండొచ్చు కద నాయన ..అమ్మాయి కుందనపు బొమ్మలాగ ఉంటుంది రా.. పైపెచ్చు మొన్ననే పదవ తరగతి ఫస్ట్ క్లాసులో ప్యాసయ్యింది కూడాను ..." అని అంది ...

" నీ మాట విని , మైనర్ బాలికని చేసుకున్నాననే కేసులో కటకటాలు లెక్కపెట్టే బదులు , ఇలా ఇళ్ళమీద పడి తినడమే సౌకర్యంగా ఉంటుంది నాకు .. నువ్వసలు సమస్యని ప్రక్క దారి పట్టించే ఎక్స్ పార్టీ ఎమ్మెల్యే లా మాట్లాడకుండా , అడిగిందానికి సమాధానం చెప్పవే ... ఏమి తీసుకెళ్ళాలో చెప్పు ??? "

" బహుమతులు , గట్రా అంటూ డబ్బులు దండగా చేసుకోకు నాయన .. అంతగా ఎమన్నా ఇవ్వాలనిపిస్తే భొజనం చేశాక యాభయ్యొక్క రూపాయలు కట్నం చదివించు " అంది ..

" నేను వెళ్ళేది శ్రీమంతం ఫంక్షన్‍కో లేక బారసాలకో కాదమ్మమ్మ .. డబ్బులు చదివించడానికి ... అయినా నిన్నడిగాను చూడు ,నాదీ తప్పు .. " అంటూ చిరాగ్గా ఫోన్ కట్ చేశాను ...

చేసేదేమి లేక , ఒట్టి చేతుల్తో వెళ్ళడం ఇష్టం లేక , చేతులకి గ్లోవ్స్ తొడుక్కొని బయలుదేరాను.

" సుబ్బారెడ్డింటికి అరగంటలో చేరుకొని , కాలింగ్‍బెల్ కొట్టాను .. "

" ఒకావిడ తలుపు తెరిచింది ... గ్లోవ్స్ వేసుకున్న నా చేతులకేసి అనుమానంగా చూసి , మామగారు అని అరిచి పిలిచింది .. వయసులో పెద్దాయనొకాయన లోపలి నుండి వచ్చాడు ... జేబులు కత్తిరించేవాడిని చూసినట్టు అనుమానంగా నన్ను ఎగాదిగా చూశాడు ..

నేను " అది , ఎందుకంటే .. సుబ్బారెడ్డి ... కొలీగ్ .. అమ్మ .. ఆవు .. బొమ్మా .. బొరుసు .. " అంటూ తెలుగు సీరియల్ పాత్రధారిలా , ఇబ్బందిగా మాట్లాడటం మొదలెట్టాను.

ఇంతలో ఆపద్భాందవుడిలా , " రా .. రా .. లోపలికి రా విజయ్ .. " అంటూ లోపలి నుండి వచ్చాడు సుబ్బారెడ్డి ..

" నేను చెప్పాను కదా ... నాతో పని చేసే కొలీగొకతను ఈ రోజు భోజనానికి వస్తాడని , తనే ఇతను " ... తన భార్య, నాన్న అంటూ , నన్ను చిరాగ్గా , " దాపురించావా ??" అన్నట్లు చూస్తున్న ఆ ఇద్దరిని నాకు పరిచయం చేసాడు ..

ఇబ్బందిగా నవ్వుతూ లోనికెళ్ళి సోఫాలో దిగబడ్డాను ....

నేనిప్పుడే వస్తాను , అంతసేపు ఇది చూస్తూ ఉండని తన పెళ్ళి ఆల్బమిచ్చి లోనికి వెళ్ళాడు సుబ్బారెడ్డి , నన్ను హాల్లో వదిలేసి.. ముసలాయన టీవి చూస్తున్నాడు ....

" పట్టపగలు అరుంధతి నక్షత్రాన్ని చూపుడు వేళ్ళతో చూపిస్తూ , నవ్వుతూ , దంపతులిద్దరు దిగిన ఫోటొ చూస్తున్నా .. ఫోటొలో, పంతులు వాళ్ళిద్దరి కంటే ఎక్కువగా నవ్వుతూ కనిపించాడు ..బహుశా , పట్టపగలు తనకే కనబడని నక్షత్రాన్ని , కేవలం తన మాయమాటల్లో పడి , కనబడుతున్నట్లు నటిస్తున్న ఆ దంపతులని చూసి నవ్వుతున్నాడు కాబోలు ...

నా ఆలోచనకి నాకే నవ్వొచ్చింది ... నా కంటే బిగ్గరగా నవ్వుతూ వినిపించాడు ముసలాయన ... ఏంటా అని చూస్తే , టీవీలో " నేరాలు .. ఘోరాలు " వస్తుంది ... నూతన్ ప్రసాద్ వాయిస్ ఓవర్‍లో సీరియల్‍లో క్యారక్టర్‍లు చేతులు , తలలూపుతూ పెడుతున్న హావభావాలు చూసి నేను కూడా బిగ్గరగా నవ్వాను ...

నా నవ్వుకి , ఆ ముసలాయన నా వైపు చిరాగ్గా చూశాడు .... నవ్వడమాపేశాను నేను ...

కాసేపాగి , " పెళ్ళయ్యిందా బాబు ?? " అనడిగాడు ముసలాయన ....

" ఎవరికండీ ?? " అని తత్తరపాటులో నేనడిగిన ప్రశ్నకి , " నాకు " అని వెటకారంగా సమాధానమిచ్చాడు ముసలాడు ....

చేసెదేమి లేక , రాజేంద్ర ప్రసాద్‍లా ఒక నవ్వు నవ్వి , " అబ్బే ! ఇంక కాలేదండి " అని అన్నాను ...

" యే పాపం ? ఎందుకు " అనడిగిన ఆ ముసలాడి వాయిస్‍లో వ్రేళ్ళూనికపోయిన వెటకారం తాండవమాడింది ...

"ఇంట్లో సంబంధాలు చూస్తున్నారండి ... పిల్ల దొరకగానే పెళ్ళి " అని నా ప్రాసకి లోలోన సంబర పడ్డాను ...

" తొందరగా చేసుకో బాబు .. ముదిరిన బెండకాయ , ముదిరిన బ్రహ్మచారి ఎందుకు పనికి రావు బాబు? " అన్నాడు ఈవివి సినిమా డైలాగ్ రైటెర్‍లా , నా బాడీ లోయర్ పోర్షన్‍పై కాన్సెంట్రేట్ చేస్తూ ..

" నేనైతే, నీ వయసుకి తొమ్మిది మందిని కనేసి , ఆపరేషన్ కూడా చేయించుకున్నాను తెలుసా ??? " అన్నాడు మీసం మెలేస్తూ ..

" పందిలా డజన్ల కొద్ది కని , దేశ జనాభా సమస్యని పెంచిపోషించింది చాలక , ఎదో ఘనకార్యం చేసినట్టు మీసం మెలేస్తావేంటిరా ముసలి నక్క .... " అని కసి తీరా తిట్టుకున్న మనసులో ,బయటికి నవ్వుతూ ...

" ఏ ఊరోయ్ నీది ? " అని ముసలాడడిగిన ప్రశ్నకి , " రామగుండం , కరీంనగర్ జిల్లా " అని సమాధానమిచ్చాను ...

ఏంటీ ????? అనడిగాడు , టీవీని మ్యూట్‍లో పెడుతూ ..... నేను ఈ సారి పిన్‍కోడ్‍తో సహా అడ్రెస్స్ చెప్పాను ...

" తెలంగాణానా ???????????? "

అవును , ఐనా అన్ని క్వశ్చన్ మార్కులెందుకండీ ???

" నీకిక పెళ్ళి అయినట్టే ...... ప్రభుత్వం మీకు ప్రత్యేక రాష్ట్ర్రమే ఇవ్వట్లేదు , ఇంకా నీకు పిల్లనెవరిస్తారోయ్ ? తెలియకడుగుతా ... " అన్నాడు వెటకరిస్తూ ..

నా కోపం హాల్ సీలింగ్ దాకా చేరింది ... ఎలాగైనా ముసలాడి జుట్టు సంపాదించి , రాత్రికి చేతబడి చేసి , వాడి ఎడమ చెయ్యి ,నోరు పడిపోయేట్టు చేయాలని నిర్ణయించుకున్నాను ..

నా కోపం మీద నీళ్ళు జల్లుతూ , ముసలాడి బట్టతలపై , 4 వెంట్రుకలు ఫ్యాన్ గాలికి ఊగుతూ కనబడ్డాయి ... చేసేదేమి లేక , సురేష్ గోబి తిట్లన్ని మనసులో తిట్టుకొని సంత్రుప్తి పడ్డాను ..

ముసలాడు దిక్కుమాలిన ఓంకార్ గాడి డ్యాన్స్ షో పెట్టాడు టీవీలో ... నాకున్న కోపానికి చిరాకు , వెగటు , అసహ్యం , జుగుప్సలు జతయ్యాయి , ఆ షో చూస్తుంటే ...

క్షణక్షణానికి నా పరిస్థితి క్షీణిస్తుంది ... ఇంతలో నా ఫోన్ మోగింది ...

సిగ్నల్ అందనట్టు నటిస్తూ , ఇంటి బయటికి వెళ్ళి వెనక్కి తిరక్కుండా పరుగు తీసాను ...

ఆ ముసలాడి బారి నుండైతే తప్పించుకున్నాను , కాని ఒక బ్రహ్మచారిగా సమాజపు సూటిపోటి మాటల నుండి , దురాగతాల బారి నుండి మాత్రం తప్పించుకోలేకపొతున్నాను ... బ్రహ్మాచారి అంటే ప్రతీ వాడికి లోకువే ... " పప్పన్నం గురించి పెళ్ళి చేసుకోమనే వాళ్ళు కొంతమందైతే ..... యవ్వనం , పెట్రోల్ ఎక్కువ కాలం ఉండవని పెళ్ళి పేరిట లేని పోని అనుమానాలని లేవనెత్తే వాళ్ళు ఇంకొంతమంది ...

ఈ సాంఘీక దురాచారాన్ని అరికట్టే చట్టమే లేదా ??? సభ్యసమాజపు అసభ్య ధోరణిని ప్రశ్నించే నాథుడే లేడా ? ముదురు బెండకాయలు , పచ్చి కాకరకాయల్లాంటి పదప్రయోగాలపై పోటా లాంటి చట్టాలని ప్రయోగించే వెసులుబాటు లేదా ? తెలుగు సినిమాలో హీరోయిన్‍ ఒంటి నిండా బట్ట కట్టే రోజు రాదా ? ఒక్క అందమైన అమ్మయన్నా మా టీమ్‍లో జాయిన్ కాదా ? మీరు వాడే టూత్‍పేస్ట్ లో ఉప్పు లేదా ? క్షమించాలి , ఫ్లోలో సిలబస్‍లో లేని క్వశ్చన్స్ అడిగేశా ...